إستضافت حلقة اليوم من راديو مباشر الأستاذ سامح أبو عرايس رئيس قسم التحليل الفني بشركة بايونيرز لتداول الأوراق المالية
.- وقال أن هناك اتجاه صعودي كنا نتكلم عنه منذ فترة وهو هايحقق مستويات تاريخية جديدة ويوصل لمستوى 12000 نقطه ده اللى إحنا شايفين إن بيحصل دالوقت طبيعي جدا مع ارتفاع السوق إن عند الوصول لكل مستوى حاجز نفسي أو ROUND NUMBER إن بيحصل بعد عمليات جني الأرباح من المستثمرين دي اللى بتأدي إن يحصل نوع تصحيح في صغير في المدى القصير أو نوع من التوقف قبل المستويات النفسية المهمه منها مستوى 11ا ألف إلى إحنا شايفينه دالوقت مثلا ده أنا مش شايفه أكثر من مجرد حاجز نفسي ما هواش حاجز حقيقي . في زمان إحنا مجرد إن إحنا كسرنا مستوى 10 آلاف وثبتنا فوقه وقدرنا نتجاوز الـ10500 تاني ده إيجابي شايفين ارتفاع ملحوظ في أحجام تداول مع ارتفاع الأسعار وانخفاض مع انخفاض أسعار والتصحيح بقى ياخد شكل تصحيح في وسط الجلسة ما بيستمرش لعدة أيام فده برضه صحي للسوق شايفين ارتفاع ملحوظ في مشتريات الأجانب فده برضه إيجابي ومعنى ذلك ان هناك فلوس جديدة بتدفق للسوق من خارج السوق فده إيجابي برضه فالوقت الحالي لو هانعمل تحليل لمؤشر كاس 30 شايفين إن هو لسه في اتجاه صعودي مستهدفين في في المدى القصير للمتوسط الأجل مستوى 12 ألف نقطه وعندنا حاليا مستويات دعم الرئيسي عند 10500نقطه والمقاومة الحالية اللى إحنا بنواجهها اللى هي 11 ألف بننتظر إن إحنا نتجاوزها قريب جدا إن شاء الله لتحقيق مستويات تاريخيه جديدة برضه يمكن 12 ألف متكنش هي آخر اللى نشوفه طبعا احنا خلال السنة دية بنتوقع نشاط لعديد من القطاعات بالذات القطاعات اللى مشهدتش حظها من الارتفاع السنه اللى فاتت وفي العديد من القطاعات عليها أنباء إيجابية من ناحيةINTER MARK منها أسهم الحديد والصلب على سبيل المثال.- طيب تعليق حضرتك إيه على تصدر أسهم المضاربات قائمة الأسهم الأكثر ارتفاعا النهارده؟- والله أنا برضه ضد تقسيم الأسهم قوي لموضوع أسهم مضاربات وأسهم استثمار أو كده لأن إحنا من ناحية التحليل الفني بنقسم الأسهم لثلاثة أنواع من الأسهم النوع الأول بنسميه الأسهم الدفاعية وده بتكون حركاتها أدائها أقل من أداء السوق سواء في الارتفاع أو في الانخفاض وديه بتناسب المستثمر المتحفظ بنقيسها بمعامل معروف عند مديري المحافظ وهو معامل بيتا بيكون معامل بيتا بتاعها أقل شوية من بقية السوق وعندنا جزء ثاني من الأسهم أو نوعية ثانية من الأسهم بتكون معامل بيتا بتاعها مرتفع بتكون حساسيتها عاليه للسوق بترتفع بقوة مع ارتفاع السوق بتعمل أداء أعلى من أداء المؤشر وبتنخفض بنسبة أعلى برضه مع انخفاض السوق وفيه نوع تاني من المؤشر بتكون وسط بين الإثنين بيناسب المستثمر المتوسط طبعا التانية اللى هي الأسهم الهجومية اللى هي معامل بيتا مرتفع ديه بتناسب المستثمر المخاطر أغلب الأسهم اللى بتسمى أسهم المضاربات ما هي إلا أسهم هجومية معامل بيتا بتاعها مرتفع فإحنا شايفين مش بس الأسهم الصغيرة أو اللى بيتركز في تعامل الأفراد هي اللى بترتفع وإنما أسهم زي المصرية للاتصالات وأوراسكوم للإنشاء والصناعة لسه محققه أعلى سعر تاريخي من يومين فأنا شايف السوق كله إيجابي مش بس أسهم المضاربات.- طب اسمح لي نحلل مع بعض أداء مجموعة من الأسهم اليوم تدم التداول على القاهرة للإسكان خلال الجلسة على سعر 20.60 جنيه وأغلق عند 19و 17 تحليل حضرتك إيه لأداء هذا السهم وتقييمك لأداء هذا القطاع؟- والله إحنا ما نقدرش نحلل برضه القاهرة للإسكان بمعزل عن قطاع الإسكان كله قطاع الإسكان كله بيشهد مرحلة نشاط واتجاه صعودي أو استكمال اتجاهه الصعودي اللى هو كان بدأ فعلا من السنه اللى فاتت وزي ما شفنا إن حاجه زي مصر الجديدة للإسكان اللى هي بعتبره السهم القيادي الرئيسي في قطاع الإسكان كسر حاجز الـ600 جنيه زي ما كنا متوقعين بيستمر وشايفين إن هو ان شاء الله قريب ممكن يحقق مستوى تاريخي جديد فوق الـ660 جنيه اللى هو كان عملها قبل كده القاهرة للإسكان نفس الكلام كان أظهر مؤشرات شراء بقوة من حوالي أسبوعين وكنا مستهدفين فيه فعلا إن هو يقدر يتجاوز الـ20 جنيه وده اللى احنا شايفينه فيه وما نقدرش نفصلهم عن سهم زي طلعت مصطفى اللى هو بعتبره من قطاع الاسكان برضه وشايفين إن هو حقق مستويات إيجابية النهارده قطاع الإسكان متفائلين بيه وهو طالع مش بس لمضاربات أو كناحية متاجرة وإنما وراه Fundamental بتدعمه من نشاط القطاع العقاري الموجود في السوق المصري والواضح جدا مش بس في مصر في المنطقة العربية كلها فطبعا متوقعين مزيد من الاداء الجيد في الفترة اللى جيه إن شاء الله.
- طيب اليوم تراجعت الأسهم القيادية في السوق زي OT و OCI تفسير حضرتك إيه لهذا الموقف وتحليلك لأداءها؟
- والله هو التراجع اللى تراجعت ليه ده طبيعي جدا لأن هي حققت فعلا ارتفاعات قوية قبل كده لو مسكنا أوراسكوم للإنشاء والصناعة لسه من يومين عملت سعر تاريخي كسرت سعر 610 جنيه يمكن أعلى شويه وده أعلى مستوى السهم ده يجيبه في تاريخه فطبعي لما يتراجع من 610يعمل 599أو 598أو 600 جنيه ما نعتبرش إنما ده تصحيح طبيعي وصحي جدا للسوق بالعكس لو السهم استمر في الارتفاع بدون أي حركات تصحيح على الوقت القصير ده اللى يقلقنا أوارسكوم للإنشاء والصناعة لسه شايفين صورته أيجابيه مفيش أي حاجه تدي في بوادر انعكاس للاتجاه لحد دالوقت إحنا بنفضل دائما في Technical analysis إن إحنا نشوف نخلي السوق هو اللى يقول لنا هايعمل إيه السوق لسه مدينا Up traind لأوراسكم للإنشاء والصناعة وشايفين إن هو في الأغلب هايعرف يكسر الـ610تاني ويعمل لنا مستوى تاريخي جديد اوراسكوم تليكوم بنستهدف فيه إن هو يكسر حاجز الـ100 جنيه إن شاء الله قريب.
- تجاوز اليوم برضه سهم المصرية للاتصالات مستوى 23 جنيه اسباب ده ايه حضرتك وتقييمك إيه لأداء القطاع بشكل عام؟
- والله سهم المصرية للاتصالات برضه شايفين إنه في اتجاه صعودي طويل ومتوسط الأجل وحاليا حتى قصير الأجل كمان اتجاهه صعودي إحنا بندي عليه توصية شراء على المدى القصير وعلى المدى المتوسط يمكن بندي شراء قوي على سهم المصرية للاتصالات إحنا شايفين إن هو هايتجاوز أو فوق الـ26 جنيه وده بيمثل ارتفاع تاريخي بالنسبة لقطاع الاتصالات كله لأ إحنا شايفينه على المدى الطويل والمتوسط سواء سهم المصرية للاتصالات المستهدف فيه 26 جنيه أو أوراسكم تليكوم زي ما قلنا من شويه المستهدف فيه انه يكسر حاجز الـ100 جنيه وعندنا سهم المصرية لخدمات التليفون المحمول اللى بنستهدف فيه 240 جنيه برضه على المدى المتوسط والطويل الأجل بالنسبة لراية القابضة ممكن نقول رابع سهم في قطاع الاتصالات برضه شايفين إنها في اتجاه صعودي ومتوقع إنها تتجاوز 14 جنيه وتوصل 14.80 ان شاء الله في المدى القصير والمتوسط.-
طيب أستاذ سامح قطاع الإنشاء ومواد البناء بيشهد حالة من النشاط خلال هذا العام ومنذ شهور خاصة مع ارتفاع أسعار الحديد رؤية حضرتك إيه لأداء القطاع خاصة سهم عز للحديد والصلب؟
- والله قطاع الحديد ده من القطاعات الواعدة جدا واللى أنا متوقع لها إن شاء الله قطاع الحديد والصلب متوقع لها السنة دية إن شاء الله تعمل أداء إيجابي يمكن شايف إن السنة دية هاتكون أسهم الحديد والصلب تعمل أداء لأنها ما أخدتش حظها في ارتفاع السنة اللى فاتت بالذات أسهم حديد عز اللى إحنا شايفينه وأي حد متابع للأسواق العالمية شايف إن في ارتفاع ملحوظ في اسعار الحديد والمعادن عموما مش بس الحديد بس يمكن الدهب لسه من يومين عامل الأعلى في تاريخه برضه أعلى مستوى في تاريخه ده بنعتبره لبقية أسعار المعادن وشوفنا ارتفاع تجاوز 35% خلال الشهور اللى فاتوا في أسعار الحديد وبالتالي ده هايكون له انعكاس إيجابي على أسهم بين سعر الحديد وسعر الشركات العاملة في صناعة الحديد وعلى رأسها شركة حديد عز طبعا بالتالي احنا شايفين أسهم الحديد الصلب كلها في اتجاه صعودي بالنسبة لسهم حديد عز إحنا بنستهدف فيه على المدى الطويل أو ممكن نقول من المتوسط إلى طويل الأجل إن هو يحقق مستوى تاريخي جديد يمكن شايفين فيه الـ120جنيه مش بعيده طبعا انا ما بكلمش خلال يومين أو شهر وإنما بنكلم يعني لو سنه أو أكثر هانشوف فيه فوق الـ120 جنيه إحنا بنكلم دالوقت إن هو فوق الـسبعينات فده طبعا في فرصة شراء قويه يزيد عن كده كمان تقييمات التحليل المالي اللى شايف إنها بتتراوح بين 86 جنيه التقييمات المتحفظة لـ94 جنيه للتقييمات المجازفه أكثر شويه شايفين في تصحيح بين سهم حديد عز وبين أسهم العز للبورسلين الجوهرة اللى هو ممكن متوقع ليه إنه يكمل ارتفاع كمان وعندنا سهم الدخيله نجح في كسر مستوى المقاومة الرئيسي بتاع وبدأ اتجاه صعودي جديد طبعا بيدع ده حاجتين أولها ارتفاع أسعار الحديد رخص الحديد ومصانع الحديد الجديدة اللى بتطرح حاليا
- طيب تقييم حضرتك إيه وتحليلك لأداء طلعت مصطفى اللى كان اليوم من الأسهم الافضل أداء؟
- سهم طلعت مصطفى طبعا من الأسهم اللى شايفين لها أداء كويس جدا دائما كنت بتكلم 2008 هانشوف طفرة في قطاع أسهم شركات الحديد والصلب وعلى رأسها حدد عز والجزء الثاني هايكون سهم طلعت مصطفى وأسهم باقي الإسكان ولكن أسهم طلعت مصطفى بالتحديد السهم نزل للاكتتاب فخد مرحلة كان بيمر بمرحلة هدوء زي ما بيحصل في أي سهم بينزل اكتتاب جديد في الاول بيكون في مبالغات توقعات مبالغ فيها في أداء في أول يوم أو أول يومين بيمر بعدها بمرحلة استقرار وبعدها بيبدأ اتجاهه صعودي إذا كان المؤشر كويس طبعا اللى شايفينه إنه بدأ السهم في اتجاه صعودي شايفه ممكن خلال سنة 2008 يتجاوز حاجز الـ20 جنيه إن شاء الله.- شكرا جزيلا لحضرتك أستاذ سامح أبو عرايس رئيس قسم التحليل الفني بشركة بايونيرز لتداول الأوراق المالية.- أهلا وسهلا
